fallen/legen blog
Heid a moi Dialekt – wer’s ned mog, kon ja nomoi den Seppi (1,2,3,4)lesn.
Mei des is bläd glaffa heid Fria. Bin I heid an ganzn Dog scho damisch, bin I in da Fria los, hintenrum beim W’gner, dabei war I ja vui schnella gwen, vorn rum bei da Vroni vorbei. Aber I war hoid no a bisserl, woast scho vo gestern, woast eh, a wega da Vadauung, paar Schnaps. Da Kale, hod aba a ned zum Redn aufghert. I hob die Augn kaum aufgriagt, aba Sandeln des der ma ned, ge, mir ned. Bin um 7e wieder auf, hob eh bloss auf da Couch, seitdem as Lieserl, – hob dann auf jedn Fall dringend zur Post miasn, die machan ja scho um 8e auf. Bin I d Rothemund-Gassn obe, woast eh, und dann üba d Bruckn, do is a so a Bankerl, ge, hob I mi draufgsitzt, war eh so fria dro, d Post macht ja erst um 6e zua. Vägl ham schee gsunga, sunnig war’s, warm ah, mit meiner Joppn, ge. Bin do a bisserl g’hockt, hob a bissal döst, weil z’Dod arbeiten sie eh gnua, ge, grod schee war’s bis d Müllerin vorbeikemma is und as Grantln ogfangt hod, bin i wida los, hob eh weida woin, um 12e machan ‘s Middog bei da Bost, um 12e, aba de Flaschn die hob I ihr steh lossn der Zwiederwurzn der. Wenn da Mani no lebad, mei o mei, do war no a Linie do, a Regiment mecht ma fast sogn, a Ordnung, ge. Bin I weida, wei rumhänga konnst no gnua wennst a moi hi bist. Hob ned groß g’schaut, viertl vor 12e hod’s scho glittn g’habt, mei hods mir pressiert. Bin oiso beim Grubabäcka vorbei, sieg I an Tscharli beim Ungererneibau aufm G’rüst steh. I blär aufe, er schaut obe, sauba gloane Augn hod a no g’habt, mei mir ham hoid a no gwatt bis fast scho wieda hell worn is, ge, schaut er oiso obe und blärrt zruck. Blärr ma a bissi hi und her, Weda, freilich, Wattn, eh klar, ge woast scho, wos ma hoid so blärrt wenn ma si sigt. Blärrt da Polier dazwischn, wo de Kreissog bleibt, do schau her sog i, issa heid Kranfahra da Tscharli, an dickn Gürtel um de dicke Wampn. Sauba, sog i und schau erm zua. Aufe fahrt der Hakn und ausse de Katz am Auslieger, dann draht a sie, mir werds glei wieder schwindelig, obe fahrt der Hakn in Gartn von da Schmidt, da Amir macht de Kreissog fest und dann, Dann fahrt er wieda aufe, da Kran. I kenn des ja scho ois, bin schließlich a a Arbeita, woas scho wias laft, a bissal langweilig is scho, aufe, ume, obe, blär i am Tscharli nomoi, de Katz fahrt ausse, der Kran draht se umme, da Tscharli schaugt obe, obe zu mir, na ned zu mir, an mir vorbei, I schaug a an mir vorbei, schaug d Vroni o, von om bis unt, dicke Wadeln und bralle Schenke in am kurzn Rock, mei de Vroni, a Dekollte wia de schlafende Jungfrau, ois is in Bewegung, auffe, obe, ume. Mi triffts wia da Bliz, im Augnwinkl sieg i an Tscharli der oba gafft und an Kran der sie draht und die Katz die ausse laft, bis ganz ausse an d Spitzn vom Ausleger. Direkt üba da Vroni, koan Meta links und koan rechts, a bissal voraus, grod gnua. I siegs oiso kemma, dass da Tscharli ned rechtzeitig Stopp druckt, de Katz vorn ostässt, die Kreissog as Schwinga ofangt, der Haken, den da Amir ned sauba festgmacht hod, sie löst, de Kreissog, des schware Drum vom Bau, woast eh, a Mordsdrum, und obastürzt, genau auf de prachtvolle Vroni. I hobs kemma segn und wennst wos kemma siegst, dann hoasts obbackn, oiso hob is backt, de Vroni, woit sie ned backa lossn, hob is hoid gschubst. Bloss weg von dera Kreissog hob i ma denkt, wos sie da Tscharli denkt hod woas i ned, vielleicht hod a sie denkt, was schubst as denn da Maxe, hod auf jedn Foi Stopp druckt, kurz bevor de Katz vorn ogestässn war, geschwunga hods trotzdem, da Hakn hod sie glöst und de Kreissog is abgstürzt, an ganzn Meta friara ois i mia denkt hob, an ganzn Meta friara und genau auf de Vroni. Des war gar ned laud, eher a dumpfa Aufprall, auf da Vroni, oan Meta links und oan Meta rechts. Da Tscharli hod oba glotzt, i hob aufe glotzt, zgleich ham ma blärrt, dann hod da Polier blärrt und i bin schnei weida, hob ja no zur Post miassn, woast eh. Sandln dern Andere, mia packan zua.
Vielen Dank für ihre Aufmerksamkeit, die nächste G’schicht gibt’s nächsten Freidog.
Jörn Am 30. November 2009 um 21:33 Uhr.
Aua!